中国民主党全委会美国委员会
现在的位置: 首页 > 综合新闻 > 正文

中国外劳观察:隔牆有耳: 輸入外勞幫到手定幫倒忙? 張宇人:人工高嚇走投資

2018年05月09日 综合新闻 ⁄ 共 1563字 ⁄ 字号 暂无评论

丁志辉转自苹果日报

記:《蘋果》記者  張:立法會飲食界議員張宇人

單計勞工處招聘網頁,飲食業空缺超過5,300份,冠絕各行業。清潔工超過4,700份、洗碗員空缺逾400份,位於中環的餐廳印尼1968,更以月薪15,000元聘請洗碗員。
記:飲食業現時請人有多難?
張: 我肯定飲食業界最少缺人手過萬、接近缺兩萬人,我係摸住業界脈搏。𠵱家你走入邊一間食肆,侍應、洗碗工全部都係請唔夠人。馬鞍山有間茶餐廳,無論日間、夜間侍應、洗碗、水吧都要請人,餐廳附近係頌安邨、耀安邨、恆安邨,如果返工,幾分鐘路程都行到,咁多工冇人做,你話幾得人驚。呢間餐廳請洗碗月薪1萬蚊,可想而知,飲食業欠缺人手係缺得幾緊要。

記: 工會常說,只要提高薪水,改善福利,做好培訓便能請到人,實情是否如此?
張: 當你請洗碗,月薪畀到萬二、萬三、萬五,咁畀侍應要幾多呢?無可能畀八千、九千啩?廚師畀幾多呢?水吧值幾多?收銀值幾多?唔通收銀員八千蚊?洗碗員萬六蚊?當然我哋冇用三萬蚊請洗碗。
工會最叻講,「你班友畀唔夠錢請人!你班友剝削!」一間茶餐廳,人工佔百分之三十幾,食物成本去到百分之四十,租金百分之二十。仲有幾多空間提升工資福利呢?𠵱家失業率得三點幾,接近全民就業,你叫我去邊度請人?去同扎鐵行業頴人?比萬八蚊?人哋千八蚊一工,𠵱家扎鐵都冇人做。
記: 除了失業率低導致招聘困難,有甚麼原因導致飲食業請不到人?
張: 最低工資加到30蚊,飲食業流失咗好多人去其他舒服嘅工種,例如保安。另外,我唔係怪董建華,03年失業率高,佢搞副學士學位,提升學識水平,想香港走知識型經濟。如果我有個仔,我畀完錢佢讀副學士,畢業後佢話去做侍應搵萬二蚊,你估我會點同佢講呢?𠵱家個個讀咁多書,咁將來邊個做低下工種呢?將來邊個清潔街道呢?個個都大學畢業,唔通大學畢業生要去掃街?
記: 工會之所以擔心大量輸入外勞,最擔心是外勞會「打爛工人飯碗」,最終壓低本地工人工資,如何確保本地工人飯碗不被打爛?
張: 工會講唔厭,面皮夠厚可以繼續講。我想問,三點三嘅失業率,搶乜嘢工呢?香港輸入外勞,老闆要以薪金中位數請人,唔係最低工資。何來廉價勞工呢?何來搶呢?例如家庭傭工,以往有媽姐肯做,後尾冇,70年代香港咪輸入外籍傭工囉。人哋喺自己國家搵唔到錢走嚟做,香港咪可以釋放婦女出嚟搵錢囉。輸入外勞可以整個百分比,例如食肆請10個人,最多只係請兩、三個,有一個百分之二十嘅限制。如失業率上升,可減少百分比。行業、工種方面,唔應該箍死,因為立法會有時唔知行業發生乜事。
工會認為香港現時已有「補充勞工計劃」,讓個別行業出現人手不足時,可根據計劃申請輸入合理數量外勞,故反對擴大輸入外勞。但數字顯示,2012年,計劃申請近6,000宗,批出2,000宗,其中「批發、零售、進出口貿易、飲食及酒店業」申請300宗,批出84宗,成功比率不高。
記: 補充輸入勞工計劃不能解決業界人手不足問題?
張: 呢個計劃,我日日都收到唔同人嘅投訴,最近有間西班牙餐廳,因為香港人冇人識整Paella(西班牙海鮮飯),政府只係批由西班牙請一個廚師、一個經理來港。計劃個缺點係批出嘅工種、人數好少,因為驚俾人鬧。申請待批係以年計,唔係以月計。
記: 若果沒有外勞,業界爭相高價搶人,你可以預見會出現甚麼情況?
張: 人工高你估一定開心嘅咩?到啲人因為香港人工高,請唔到人,唔嚟香港投資,到時你畀錢都請唔到。邊個老闆肯投資2,000萬,晚晚因為請唔到洗碗員,要個經理食食吓飯走去洗碗,呢啲情況係開始緊。我唔係講笑,你會發現香港會有撤資、競爭力越嚟越差嘅情況。
最終,老闆搵少啲錢,攞多啲錢出嚟請人,生意倒閉。有日你會發現個豬扒飯60蚊,三年前係28蚊。香港仲點競爭?深圳同一碟由相同中央工場整出嚟豬扒飯,一樣味道,一樣好食,可以賣22蚊,到時唔通個個坐車過去深圳食?

给我留言

您必须 [ 登录 ] 才能发表留言!

×